Се договоривме со @mufix ја да готвам а тој да слика за неговиот проект 365. Изборот за крем бруле беше
- 600 грама павлака за готвење (халта или хопла како и да ги викаат народски кажано)
- 1 лажичка ванила екстракт
- 6 жолчки од јајца
- пола чаша шеќер во прав
- 4 до 5 лажици обичен шеќер
Ставете ја павлаката во тавче заедно со екстрактот од ванила и тавчето ставете го на оган. Кога ке почне да проврива тргнете го веднаш од оганот. Во друг сад ставете ги жолчките и шеќерот во прав и матете ги со миксер се додека жолчките не почнат да побелуваат, тогаш пополека додавајте ја павлаката продолжувајки со мешање.
Крем брулето по традиција се служи во сад наречен Рамекин. Тоа е порцелански сад кој дозволува во него и да се пече. Рамекини со идеална големина може да си купите во ДЛ Конкорд позади Броз кафе во Скопје или во Арт Глас на пластичарска улица. И се доста евтини помеѓу 50-70 денари.
Изматениот крем го ставаме во рамекините а потоа истите ги ставаме во тавче. Тавчето го полниме со врела вода да дојде до половина на ремекините (Овој метод се вика печење во бања). Така ги ставаме во фурна да се печат на 120 целзиусови степени околу 40 минути.
Кога ке ги извадите оставете ги малце на собна температура да се оладат а потоа ставете ги во фрижидер да се стегнат. Најмалку 1 саат.
За да подготвите Крем Бруле исто така ќе ви треба и бренер за да го карамелизирате шеќерот на површина. Плински бренер како на сликата подоле може да купите од било кој пазар кај што продаваат алати. Постојат и специјални бренери за користење во кујна што се малце по мали со помал млаз на оган, меѓутоа користат нестандардни плински боци и се доста поскапи.
После еден саат извадете ги Рамекините од фрижидер, поросете ја горната површина од кремот со тенок слој од обичниот шеќер.
А потоа со бренерот карамелизирајте го шеќерот но внимавајте да не претерате. Шеќерот продолжи да се затемнува дури и од кога ке престанете да го горите. Затоа престанете некаде на половина од посакуваната боја на брулето.
Откако ќе го изгорите шеќерот оставете го барем 10 минути да олади во фрижидер за да се стврдне шеќерот на површина. Така се добива на површината како стаклена шеќерна тврда кора што практично треба да ја скршите со лажичка пред да јадете. Така си направивте бруле за вашиот крем. Исто така доколку сакате пред некој гости да го направите горењето може да ја полеете површината на шеќерот со скоч и да го запалите да гори пред нив.
